Hesperian Health Guides
Ki lè pou w fè yon egzamen basen
Yon egzamen basen ka fèt san danje e l ap itil lè sa yo:
- Fi a vle konnen kondisyon sante kòl matris li, sante matris li, ak sante ovè l yo. Asireman, ou dwe fè egzamen sa si fi a gen siy enfeksyon oswa siy kansè. Men, yon fi gendwa gen enfeksyon oswa kansè nan kòl matris li oswa nan matris li san l pa montre okenn siy. Kidonk, si sa posib, medam yo ta dwe fè egzamen sa chak detwazan, menmsi yo pa gen siy ki endike yo gen yon pwoblèm.
- Fi a ansent epi ou bezwen konnen depi konbyen tan li ansent.
- Fi a bezwen mete yon esterilè (gade Chapit 21).
- Fi a gen pwoblèm apre yon foskouch oswa yon avòtman (gade Chapit 22), epi li bezwen yon kitaj (gade Chapit 23).
ATANSYON! Li danjere pou w fè yon egzamen basen lè sa yo:
- Fi a gen tranche. Li pa nesesè pou w fè yon egzamen vizyèl, yon egzamen espekilòm, oswa yon egzamen 2 men lè yon fi gen tranche. Si w oblije verifye kòl matris li pou w wè si l ap ouvri.
- Fi a pase likid. Si fi a ansent epi li pase likid, egzamen sa ka simaye enfeksyon nan matris li.
- Fi a rive nan fen gwosès la epi l ap bay san nan vajen. Si l ap bay san nan vajen nan fen gwosès la, gendwa se plasenta a ki twò ba. Pa fè egzamen basen, sinon ou ka fè l senyen pi rèd.
- Fi a gen kèk semèn sèlman depi l te akouche.
Ki jan pou fè yon egzamen basen san danje
Jeneralman, yon egzamen basen pa gen danje, men li ka gen risk. Lè w ap fè yon egzamen basen, fòk ou asire w ou pa mete okenn mikwòb nan vajen fi a. Lè w ap fè yon egzamen basen, men sa pou w fè:
- Toujou byen lave men w ni anvan, ni apre egzamen an.
- Toujou mete gan plastik ki trè pwòp oswa ki esterilize.
- Toujou sèvi avèk zouti ki pwòp.
Si w pa ka lave men w oswa mete gan, l ap twò danjere pou w fè egzamen an.
Ka gen lòt fason pou w jwenn enfòmasyon sou eta sante yon fi si w pa ka fè yon egzamen basen san danje, oswa si w pa konnen ki jan pou w fè yon egzamen basen, oswa si fi a pa vle fè yon egzamen basen.
Pa egzanp, pou w ka konnen si yon fi fè enfeksyon nan matris, mande l si l gen kèk siy enfeksyon epi pran tanperati li. Epitou, ou ka eseye peze vant li, yon ti jan pi wo pase zo basen an. Si l gen enfeksyon nan matris, kote sa ap fè l mal anpil. Sa yo se fason ki san danje pou w wè si yon fi gen enfeksyon paske w pa oblije mete dwèt ou anndan vajen fi a.