Preparasyon pou travay ak akouchman

SanteWiki > Kote Fanm Pa Jwenn Doktè > Chapit 6: Gwòses ak akouchman > Preparasyon pou travay ak akouchman

Nan chapit sa a, n ap jwenn:

 

Nan chapit sa a, n ap jwenn:

Kèk bagay ou dwe pare met la anvan akouchman an

Depi l gen 7 mwa gwosès, yon fanm ansent dwe gen tout bagay sa yo tou pare:

savon ak alkòl	fil pwòp
dra pwòp jilèt tou nèf 2 kivèt, youn pou twalèt, youn pou yo mete plasennta a

---

Men kèk lòt zouti yon fanm saj oubyen yon matwòn ka genyen:

flach

fetoskòp

Sizo byen file pou koupe lonbrik tibebe a (sitou si sa dwe fèt anvan timoun nan fin soti)

gan oubyen sache plastik esterilize (san mikwòb)

zegwi esterilize ak fil ki pa bezwen dekoud pou koud kote vajen fanm nan dechire

sereng ak zegwi esterilize

plizyè anpoul piki ègonovin, ègometrin, oksitosin, osinon misoprosto

ART (medikaman VIH) pou granmoun ak tibebe si moun ansent gen VIH

Pomad tetrasiklin oubyen eritwomisin pou je tibebe a

Ponp pou rale flenm nan nen ak nan bouch tibebe a

---

Li lè tou pou n:
prepare kesyon transpò a, sizoka nou dwe al lopital	netwaye chanm kote akouchman an pral fèt la

Aprann sou travay ak akouchman fè nenpòt moun ki pi byen kapab ede lè yon moun ap fè yon tibebe.

Lè nap ede yon fanm akouche

Si w ansent, li enfòmasyon sa yo pou w ka konnen sa k ap pase nan travay la ak apre akouchman an. Enfòmasyon sa yo ka sèvi w tou, si w gen pou w ede lòt fanm akouche.

Si w ap ede yon fanm akouche, ou ka fè yon bèl travay, lè w rive ede fanm nan akouche san danje, san pwoblèm. Pa bliye pi fò timoun fèt san pwoblèm.

Rete kè kal, rete janti. Bay manman an konfyans, pou l pa pè. Fè l konnen ou sèten li kapab akouche san pwoblèm.

Pou yon akouchman san danje, respekte prensip 3 N yo:
1. Netwaye (lave) men w.	2. Netwaye kote akouchman pral fèt la.	3. Netwaye zouti w anvan w koupe lonbrik timoun nan.

Men sa w dwe fè:

• Koupe zong ou kout epi kenbe yo pwòp.
• Lave men w ak savon nan dlo pwòp. Kite men yo seche nan lè a (pa siye yo).
• Chèche konnen ki fanm ki gen plis chans gen pwoblèm epi chèche konprann tout siyal danje gwosès yo byen. Fè yon jan pou fanm nan akouche nan yon sant sante oubyen lopital si danje sa yo egziste.
• Chèche konnen ‘Siyal danje pandan travay yo’. Kouri lopital ak fanm lan, si w remake nenpòt nan siyal sa yo.
• Trete fanm nan ak jantiyès, ak respè.

ATANSYON! Mete gan pwòp nan men w pandan akouchman an, pou w pwoteje tèt ou kont sida ak epatit. Si w pa jwenn gan, sèvi ak sache plastik byen lave.

Men sa w PA dwe fè:

• Pa foure dwèt ou, pa foure anyen nan vajen fanm nan. Si w tyeke lajè ouvèti matris la, sa p ap ede timoun nan soti e, mete sou sa, sa ka lakòz yon move enfeksyon.
• Pa bay fanm nan ankenn medikaman pou w akselere oubyen fè tranche a vin pi fò. Medikaman sa yo ka touye ni manman an, ni tibebe a. (Se sèlman apre akouchman, pou san an ka rete, ou gen dwa sèvi ak medikaman ki fè matris la kontrakte.)
• Pa fòse fanm nan pouse, si l pa ko pare. Lè timoun nan rive nan lè pou l fèt, manman an ap santi sa menm jan l konn santi lè l bezwen fè poupou. L ap kòmanse pouse pou kont li.
• Pa peze matris la, pou w fè timoun nan soti pi vit. Sa ka fè matris la blese e sa ka fè plasennta a detache twò bonè. Ni manman an, ni pitit la ka pèdi lavi yo lè sa a.

Nou te mete paj sa a ajou: 29 me 2025