Hesperian Health Guides
Mande pote n sekou
SanteWiki > Kote Fanm Pa Jwenn Doktè > Chapit 5: Tèt chaje jenn demwazèl nan zafè lasante > Mande pote n sekou
Fanmi w ka renmen w, menm si yo pa dakò ak tout sa w di. Se paske yo renmen w ki fè yo ka fache, se pa paske yo pa renmen w. Eseye pale avè yo ak respè epi ede yo konprann ou pi byen.
Kèk lide pou n ka pale pi byen
Èske w ta vle n pale kounye a?
- Chwazi yon bon moman pou w kòmanse pale, lè mesye dam yo pa okipe, lè yo pa fatige, lè yo pa gen anyen ki ba yo pwoblèm.
- Fè yo konnen tèt chaje w, pwoblèm ou, enkyetid ou ak rèv ou. Mande yo kisa yo ta fè, si yo te nan plas ou.
- Ba yo yon bagay pou yo li oubyen montre yo yon foto, pou w prepare dyalòg la. Ou ka li yon pati nan liv sa a avè yo, si sa gen rapò ak pwoblèm ou an.
- Si w fache, pa rele sou yo. Ou ka fè yo fache pi rèd epi yo ka panse ou pa respekte yo.
- Si w fin eseye tout teknik sa yo epi w pa ka pale ni ak manman w, ni ak papa w, toujou chèche yon lòt granmoun pou w pale. Ou ta ka pale ak yon pwofesè, ak manman yon zanmi w, ak yon matant, yon gran sè, grann ou yon moun nan legliz oubyen nan lòt kote ou lapriyè osinon yon travayè lasante.
Ki jan manman ka ede pitit fi yo
Ou ka te grandi nan yon epòk kote yo pa t pèmèt demwazèl yo fè etid fè plan sou ki kalte fanmi yo pral genyen oubyen pou yo pran desizyon sou lavi yo. Lavi pitit fi w la ka pa menm jan an. Si w koute l, si w pataje pwòp eksperyans ou avè l epi si w ba l yon seri enfòmasyon ki ka itil li, w ap ede l pran bon desizyon pou kont li. Ou ka ede l wè bon kote ki genyen nan lavi demwazèl ak fanm.
Nou te mete paj sa a ajou: 29 me 2025