Chwazi yon metòd planin

Enfòmasyon sa yo soti nan
Kote Fanm Pa Jwenn Doktè

Depi nou fin deside fè planin, nou dwe chwazi yon metòd. Pou nou ka konnen ki metòd ki pi bon pou nou, fòk nou gen bon jan enfòmasyon sou tout metòd yo, sou avantaj chak genyen, ak sou pwoblèm yo chak ka bay.

Gen 5 kalite metòd planin:

Metòd baryè yo ki anpeche fanm yo ansent, paske yo anpeche jèm gason an (espèmatozoyid) rive jwenn ak ovil (ze) fanm nan.
Metòd òmonal yo ki anpeche pòch ze (ovè) yon fanm lage yon ze (ovil), ki fè li vin pi difisil pou jèm nan jwenn ak ze a, epi ki anpeche yon gwosès devlope andedan matris la.
Esterilè (aparèy yo mete andedan matris la) ki anpeche jèm gason an kontre ak ze a, kidonk anpeche jèm gason an ansent fanm nan.
Metòd natirèl yo pèmèt fanm nan konnen ki lè nan mwa a li ka ansent. Konsa, fanm nan konnen li pa dwe al nan fè lanmou nan moman sa a.
Metòd pwen final yo. Se lè yon fanm oubyen yon gason fè operasyon pou yo pap janm ka fè pitit ankò.

N ap jwenn detay sou metòd planin sa yo nan paj ki vini apre yo. Men kèk kesyon ou ka poze tèt ou pandan w ap gade enfòmasyon ou jwenn sou chak metòd:

Èske metòd sa a pwoteje ou byen vre pou ou pa vin ansent? Konbyen fanm ki vin ansent menm si yo sèvi ak metòd sa a?
Èske li pwoteje moun kont maladi moun pran nan kontak seksyèl?
Ki jan metòd sa a pwoteje sante ou? Kèk fanm ka gen pwoblèm sante ki fè yo pa ka sèvi ak kèk metòd planin.
Èske li fasil pou ou sèvi ak metòd sa a?

Eske mari ou oubyen mennaj ou dakò pou ou sèvi ak yon metòd planin?
Ki sa n ap chache nan yon metòd planin? Ki pwoblèm ou genyen? Eske se vle ou pa vle fè pitit ankò? Eske se paske ou nouris kounye a?
Konbyen lajan metòd sa a ap koute?
Èske ou ka jwenn li fasil? Eske ou oblije al nan yon sant sante souvan?
Ki lòt pwoblèm metòd sa a ka ba ou?

Lè nou fin pran tout enfòmasyon sou metòd yo, n ap jwenn plis detay ankò sou ki jan pou nou chwazi youn ladan yo. Sa ka ede nou tou, si nou chache konnen sa mari nou, lòt fanm, oubyen ajan sante a panse sou diferan metòd sa yo.

Se ou menm sèl ki ka konnen ki metòd planin kap bon pou ou.

Rezilta chak metòd ap bay

Metòd planin	Chans pou evite fanm vin ansent	Pwoblèm li ka bay	Sa ki enpòtan
Kapòt pou gason	★★ Bon		Pi bon rezilta lè yo sèvi ak espèmisid e librifyan fèt ak dlo (likid ki pou mouye kapòt la). Sèvi avè l ansanm ak lòt metòd planin pou evite trape maladi moun pran nan fè bagay.
Kapòt pou fanm	★★ Bon
Dyafram (ak espèmisid)	★★ Bon		Pi bon lè yo sèvi ak espèmisid, men fòk li fèt pou mezi vajen an.
Espèmisid (ki pou touye jèm gason)	★ Ti chans	Alèji sou po	Pi bon rezilta lè yo mete yon lòt metòd pwoteksyon tankou kapòt oubyen dyafram sou li.
Metòd òmonal grenn, piki, tenm Enplan	★★★ Bon anpil ★★★★ Pi bon nèt	Anvi vomi, maltèt, règ pa nòmal	Danje pou fanm ki gen kèk pwoblèm sante.
Esterilè, filaman	★★★★ Pi bon nèt	Règ la ka vini ak doulè epi ak anpil san	Danje pou fanm ki gen kèk pwoblèm sante
Lanmou san kontak seksyèl (pati gason pa antre pati fi a)	★★★★ Pi bon nèt		Karese—pa gen danje trape maladi moun trape nan fè bagay; ti bèf gen ti danje; fè bagay nan dèyè gen gwo danje.
Bay tete (pandan premye 6 mwa sèlman)	★★★ Bon anpil		Fòk li bay tibebe li tete ase; fòk li poko wè règ li.
Metòd natirèl	★★ Bon		Pou byen sèvi ak metòd sa a, yon fanm dwe konnen ki lè li ka ansent. Fòk li gen dwa deside ki lè pou yo fè lanmou.
Operasyon	★★★★ Pi bon nèt		Ni gason ni fanm pap janm ka fè pitit ankò.
Voye deyò	★ Ti chans		Pi bon lè yo mete sou li yon lòt metòd, tankou espèmisid oubyen dyafram.